【P牌妈妈，一文拆解坐月知识】：坐月重嘅要性；坐月果阵点样进补；坐月禁忌！


唔知大家有冇听过一个都市传说：如果坐月期间调理同保养得唔好，足以影响女人(同老公)一生！相反，坐月坐得好，一世无烦恼。

坐月坐得唔好，通常都会出现以下嘅后遗症：


面色差，成日病

偏头痛（头风）

产后腰疼、关节痛、肌肉酸痛等

甩头发

产后抑郁

 

所以，坐月对身心嘅健康真系好重要。喺华人社会，妇女一般都会喺产后第一个月进行「坐月」传统习俗，以不同方式令身体得到充分休息，调理自体机能。


坐月重要性


1. 为什么要坐月？

老一辈嘅人会形容生BB好似「喺鬼门关走一圈」，孕妇怀胎十月，无论系顺产定开刀，生BB过程耗伤气血、产后又要喂哺母乳、照顾BB等等，一连串变化都令身心有急遽转变。简单啲讲，身体好似打完一埸仗，所以梗系需要好好休息。


2. 坐月要坐几耐?

通常为一个月，如果条件许可为三个月。中医学上，产后一个月称之为「小满月」而产后三个月称之为「大满月」，若能喺产后三个月内饮用补益性汤水，对日后体质有很大的帮助。


3. 产后坐月餐单?

重点少油少盐少糖，食少多餐。

可以参考一下我地另一篇文:坐月餐单。

 

坐月禁忌


坐月禁忌1:冲凉洗头、碰生水冷水

古时生活环境无自来水同热水，妇女好多时用井水或者溪水冲凉，其寒凉之性会入侵身体，因此「唔可以冲凉洗头」嘅习俗流传落嚟。不过，而家生活环境完全唔同，只要用热水（配合姜皮水等）冲凉或洗手，之后尽快抹干﹑避风﹑吹干头发就可以啦。


坐月禁忌2:踎低

踎低呢个动作，因盆底肌需要用力，容易令子宫下垂，再者产后妈妈气血虚弱，正所谓「踎低起身见头晕」。如果真系必需要踎低，就叫屋企人帮手扶住。


坐月禁忌3:拎重野

唔可以拎重野同踎低一样道理，两者都需要盆底肌及腹直肌用力，容易令子宫下垂，而且过大动作会拉扯到伤口，影响伤口恢复。如果要搬野嘅话，就叫屋企人帮手，妈妈最紧要多啲休息，避免不必要嘅劳动。


坐月禁忌4:吹风

因为妈妈生产后皮毛疏松，而且身体较为虚弱、免疫能力亦都下降，最易感风邪导致伤风、感冒，即喺俗语讲嘅「入风」，仲会引起关节酸痛等。所以，一般建议夏天果阵就算开冷气，但一定唔可以直接吹向妈妈，温度都唔可以过低，妈妈亦要注意保暖措施，衣着唔好过份单薄，宁愿勤奋替换衫裤。


坐月禁忌5:过高盐分嘅食物、生冷食物

过高盐分嘅食物对普通人都唔好，更何况喺产后代谢功能较差嘅妈妈。盐分过高容易造成身体浮肿，引起水肿。妈妈产后气虚血弱，如果再食用太咸嘅食物，好难改善水肿嘅问题。所以，建议坐月期间饮炒米茶去帮助减轻水肿情况。除左过高盐分食物之外，都唔建议食食生冷食物，因为产后妈妈身体脾脏虚弱，生冷食物唔单止唔利于脾胃消化吸收，亦都唔利于恶露的排出。


相信大家睇完，都对呢个坐月有一定嘅了解，希望可以帮到各位P牌妈妈！

生小朋友咁辛苦，都希望各位P牌爸爸一齐睇下了解下，一齐去迎接呢个新生命，千祈唔好做猪队友啊！一世人得个几次坐月嘅机会，希望各位爸爸喺坐月期间努力满足妈妈需要，俾佢地放返一两个月大假，因为之后就一年365日无休嫁啦！