介绍完喺坐月期间点样补气血同埋开刀坐月有咩需要注意之后，另一个好多新手妈妈关心嘅问题就系「排恶露」。恶露系指喺产后排出身体嘅分泌物，每位妈妈喺生完BB之后都会排恶露。有好多妈妈或者会觉得已经生完BB，唔使再点样护理私密部位，所以就掉以轻心。但其实恶露排出嘅过程有好多隐忧，处理得唔好嘅话可能会不停流恶露、肚腹位置疼痛、子宫瘀血内阻，有机会影响下次怀孕，甚至造成细菌感染之类嘅后遗症，问题可大可小，所以新手妈妈应该花啲功夫好好处理恶露问题。


 



恶露是什么？


恶露系指喺产后排出身体嘅分泌物，例如系胎膜、胎盘组织、脱落嘅子宫虹膜，一般会持续大概2至6个礼拜。恶露可以分为三个阶段，初期嘅恶露系鲜红色嘅，而且有一啲血块，大概会持续3至4日，然之后会慢慢变成紫色或者啡色，形态亦会变成浆糊状，大概持续半个月左右。随住时间推移，恶露会愈嚟愈少，白血球亦都会慢慢增加，变成白色嘅液体状。


排恶露喝什么？


1.     生化汤

生化汤系好多医师都大力推荐嘅排恶露中药配方，有促进子宫收缩、散瘀止血同温经止痛嘅功效，可以针对新手妈妈要排清恶露同埋瘀血积聚喺肚腹位置嘅问题。生化汤主要有五种药材，包括桃仁、当归、川芎、炮姜同炙甘草。桃仁性平味辛，炮姜性温味苦，两者都有活血袪瘀、温经止血嘅作用；当归同川芎性温味甘，可以行气调经；而炙甘草可以调和五种药材，加强温经活血嘅功效，有助排走恶露，亦都可以治疗积瘀血、子宫疼痛、恶露不行等等嘅衍生问题。


顺产妈妈可以喺产后第3日开始饮，每日一帖，饮7至10日。而开刀妈妈可以喺产后一个礼拜、排完气之后饮，都系每日一帖，但饮5至7日就够。生化汤唔可以饮太多，产后两个礼拜之后就唔好再饮，饮得太多反而会窒碍子宫内膜嘅复原，所以要适可而止。


 2.     廿八方

廿八方第一方系生化汤嘅加减方，都系传统嘅排恶露中药配方，经过专家调配，更加适合体虚嘅新手妈妈。两者同样含有当归头、川芎、桃仁、炙甘草同炮姜五种药材，有头先讲过嘅活血袪瘀、行气调经功效，帮助排清恶露，而且仲有白背木耳等等嘅药材，白背木耳含有丰富嘅铁质同钙质，可以增加血红素同修复子宫，令妈妈嘅身体可以尽快复原。而且廿八方系针对新手妈妈喺坐月期间嘅所有需要，除咗排恶露之外，其余四方可以调理身体嘅其他部位，全面补身、补血气，同埋增强免疫力抵御风寒，成效亦都非常显著，绝对系新手妈妈嘅产后调理恩物。


成个廿八方药疗系要食28日，顺产妈妈应该喺生完之后嘅第4至7日开始饮第一方，而开刀妈妈就可以喺第8至12日开始饮，视乎翻每位妈妈排恶露嘅时间。饮完第一方之后就顺序继续饮落去，直至饮完成个药疗配方。


 3.     益母草水

益母草水有别于上述嘅两款药疗，属于食疗，系一种针对新手妈妈需要嘅清恶露汤水嚟。益母草，亦即系坤草，性微寒、味苦辛，有宫缩、化瘀嘅功效，可以活血、祛瘀同调经，专门治疗恶露不尽、产后出血等一啲新手妈妈会面对嘅产后不适，绝对系妇科良药，亦都因为咁而有「益母草」呢个花名。妈妈只系需要将一撮益母草加滚水，煲5至10分钟就饮得，简单方便。


新手妈妈可以喺产后第一个礼拜嘅平补期开始饮，但同样唔可以饮太多，因为益母草具有一定药性，会造成肌肉抽搐之类嘅情况，如果饮得太密可能会对身体造成亏损，而且药性带寒，身体特别虚弱嘅妈妈要注意饮用。就算身体好强壮，大概3至4日饮一次就够。


 4.     山楂红糖水

虽然山楂同红糖都系比较常见嘅食材，但功效绝对拍得住益母草水，而两者都同样系专门治疗产后不适征状嘅排恶露汤水。山楂性温味酸甘，有活血化瘀嘅功效；红糖性温味甘，可以补气养血，而且有宫缩作用，令胎盘组织尽快化成瘀血、排清恶露。


山楂同红糖虽然性温，但对身体冇咩副作用，新手妈妈可以喺产后第一个礼拜日日饮都冇问题。


 


 



關於惡露嘅謬誤


1.     部份排惡露食物其實唔應該食

網上面有啲人話坐月期間應該食多啲阿膠、薑同酒，有助排清惡露，但其實呢三種排惡露食物係唔應該食嘅。


首先，阿膠係大補之物，雖然可以補充身體流失嘅氣血，對媽媽復原身體有幫助。但係喺產後頭一兩個禮拜身體較為虛弱，唔適宜大補。而且如果惡露流量多嘅話，好可能係因為子宮收縮得唔好，或者子宮入面有胎盤組織殘留。未排清惡露就進食阿膠補身，有機會令惡露殘留喺體內，導致惡露不盡，所以喺惡露排清之前都儘量唔好食阿膠。


又有啲講法係話煲排惡露湯水嘅時候可以落啲薑絲，除咗可以調味之外，薑仲有祛風驅寒嘅功效，刺激子宮收縮，有助惡露排出。但其實喺產後初期係唔應該食薑嘅。薑性溫熱，喺新手媽媽身體未完全復原嘅時候唔適宜進食呢啲燥熱食物，容易出現發燒、胃酸倒流，甚至大量出血嘅情況。而且太早食薑會令子宮過度收縮，打亂媽媽身體復原嘅進度。產後媽媽可以改用砲薑，熱性比薑或者乾薑低，溫補散寒之餘，刺激性同時又細啲，比較適合產後服用。


有人亦都會推薦飲豆腐釀酒湯，或者喺生化湯度加酒，因為酒有活血功效，但其實酒同時會助濕熱、行血動經，同薑一樣有機會造成出血問題，令排惡露嘅情況惡化，所以喺產後坐月期間應該禁酒。


 2.     排惡露傷口唔使護理？

有好多新手媽媽見到網上面話順產造成嘅陰道撕裂傷唔使特別照顧，亦都可以直接掂水，所以就唔理佢。無錯，雖然正常嚟講個傷口係唔使點樣護理都會好翻，但流出嚟嘅惡露可能會感染到個傷口，所以喺坐月初期都唔可以完全唔理，需要護理一吓傷口。


喺坐月頭一個禮拜，去完廁所之後，可以簡單沖洗一吓私密位置。兩個禮拜之後惡露會開始變少，咁就唔需要洗得咁密，可以等有惡露嘅時候先清洗。喺坐月初期可以用一啲夜用型衛生巾，大概每2至3個鐘換一次，避免惡露長期罨住，同埋避免細菌感染。惡露開始減少嘅時候就可以轉用普通衛生巾，再少啲嘅時候就用護墊，等到大概6個禮拜之後就唔需要再墊。


注意事項

1.     產後初期應該堅持哺乳，因為身體持續分泌母乳可以刺激催產素分泌，促進子宮收縮，加快將胎盤組織排出身體嘅時間，快啲將惡露排清晒。

2.     新手媽媽應該儘量少食寒性食物，例如生果、凍飲呢啲都唔得，因為身體仍然未復原，氣血虧虛，呢啲寒涼食物會窒礙氣血流動、傷脾胃，亦都會令惡露同瘀血冇辦法排出體外，所以坐月期間唔適宜食太多寒性食物。

3.     如果惡露有臭味、顏色變深、出現瘀塊、流量不斷增多，又或者排惡露超過一個月，呢啲都係異常情況，好可能係子宮或者陰道受到感染，應該儘早去醫院檢查求醫。