荷里活女演员丽素·慧丝（Rachel Weisz）为咗照顾初生女儿而息影三年，喺最近上映嘅漫威电影《黑寡妇》终于重回大银幕。唔讲你可能唔知，其实丽素·慧丝已经系一仔一囡嘅妈妈，仲已经51岁，但佢保养得非常好，着紧身衫都完全睇唔出有生过之余，甚至同比佢后生一截嘅施嘉莉·祖安逊（Scarlett Johansson）同场，睇落都似两姊妹多啲。大家成日见到唔少明星生完仔可以好似冇生过咁，可能会想知道有咩秘诀。其实要产后修身唔难，重点系方法有冇效。今日小编就为大家整合咗一啲产后修身方法，希望可以帮到各位新手妈妈回复青春本色。

 

点解产后咁难修身？几时修身最好？


由于新手妈妈喺生仔嘅时候会流失大量血气，新陈代谢嘅速度会减慢，好难消耗体内脂肪。而且怀孕嘅时候盆骨会被撑大，腹直肌亦会分离，腹部嘅内脏会移位，亦会出现因为子宫变大而造成血液循环，引致水肿。即使喺分娩之后，妈妈嘅肚部都唔会回复原状，所以肚部往往系新手妈妈主要肥胖嘅位置。


新手妈妈喺产后初期元气仲未完全恢复，冇办法承受到一啲剧烈运动，减肥亦会令虚弱嘅身体冇办法补充足够营养；而如果同产期相隔太耐先开始修身，脂肪已经积聚成形，好难完全消除。唔少妈妈嘅修身期都拿捏得唔准，大幅降低修身成效。所以决心修身嘅新手妈妈一定要把握产后修身嘅黄金期，亦即系产后一个月至六个月呢段时期。喺呢几个月时间，妈妈可以喺调整产后食谱同生活习惯两方面入手。


点样可以修身？


产后食谱


1.     低醣、低淀粉饮食

低醣饮食，系指减少摄取碳水化合物嘅饮食模式。一般产后食谱嘅碳水化合物比例都超过一半，而低醣餐单就会将碳水化合物限制喺20%左右，避免血糖波动同胰岛素分泌过多，积聚脂肪。建议嘅低醣餐单食物包括奶制品、去皮肉类、豆类、蔬菜、海鲜等等。由于低醣餐单会减慢血醣转化成葡萄糖嘅速度，减少体内葡萄糖同肝醣嘅含量，亦促进身体燃烧醣分嚟提供能量，加快产后修身。妈妈可以喺上述嘅食物种类入面自己挑选食物嚟调整产后食谱，譬如早餐食奶酪、午餐食鱼香茄子、晚餐食去皮鸡扒配白烚娃娃菜，减到醣分、加快脂肪燃烧之余，妈妈又食得开心。


 2.     高蛋白、低脂饮食

如果觉得低醣、低淀粉嘅产后食谱太难跟，咁就可以试吓高蛋白、低脂肪嘅食谱。呢个产后食谱着重均衡饮食，只系需要限制脂肪摄取，所以饭、面条、面包等等嘅高醣、高碳水化合物食物都可以食，妈妈亦都可以拣唔同菜式，例如寿司、海鲜Pizza、卡邦尼或者牛油果带子意粉等等，传统啲嘅中菜就有蕃茄炒蛋、青椒炒肉丝等等。新手妈妈经过长期戒口，喺修身期间都可以食翻啲好嘢，唔洗迫得咁紧。呢啲食物可以为身体提供能量，亦系一个主要营养来源，可以令啱啱生完BB、身体虚弱嘅妈妈补充足够营养。而含有丰富蛋白质嘅食物唔单止可以有效燃烧热量，仲可以维持长时间嘅饱肚感，令妈妈可以减少食量，达至产后修身嘅效果。


 3.     修身汤水

新手妈妈除咗可以喺产后食谱入手，仲可以整一啲甜品同补品嚟减轻水肿问题，例如饮红豆水同绿豆水，因为红、绿豆有利尿作用，可以排走身体多余嘅水份。新手妈妈仲可以煲一啲补身汤水，例如生化汤，令恶露可以更顺畅排出，减少水肿，帮助妈妈喺产后尽快修身。


 4.     传统药疗

新手妈妈仲可以进食一啲传统中药疗嚟修身，譬如廿八方。廿八方嘅第一方有当归头、川芎、桃仁、白背木耳等药材，有活血袪瘀、行气调经功效，亦促进血红素嘅制造，帮助排清恶露，舒缓水肿情况。而第四方有玉竹、川断、白芍、杜仲等等嘅药材，促进血液循环，加速新陈代谢，可以消耗体内嘅脂肪，有助产后修身同复原，成效拍得住上述嘅产后食谱。


产后生活习惯


1.     喂哺母乳

宜家有好多新手妈妈会选择用奶粉取代母乳，但其实用母乳喂哺有好多好处，除咗可以将营养更全面传畀BB，提升BB嘅免疫力之外，其实对修身都好有帮助。每次喂哺母乳其实都可以消耗400至500卡路里嘅热量，相等于慢跑一个钟，所以持续喂哺母乳可以燃烧大量脂肪，加快减肥。


 2.     多做运动

喺坐月期间，新手妈妈嘅身体尚未恢复，唔适宜进行剧烈嘅带氧运动，所以系坐月阶段可以进行一啲简单嘅运动嚟燃烧脂肪，例如深蹲、棒式等训练腿臀肌肉嘅动作。而喺坐月期过咗之后，新手妈妈可以做一啲全身嘅带氧运动，例如腹式呼吸、拉伸运动、平躺举肢运动。新手妈妈亦都可以出去外面缓步跑或者行山，一方面可以大量排汗，减少积存体内嘅水份，一方面可以透过运动嚟燃烧脂肪，而且屈咗喺屋企坐月咁耐又可以出去行吓，一举三得。


 3.     充足睡眠

夜晚11点至凌晨1点系胆经运行嘅时间，所以新手妈妈每晚应该11点左右就瞓觉，捕捉人体自我修护嘅黄金时期，令身体可以更有效咁进行新陈代谢，燃烧体内嘅脂肪，加速修身。


各位新手妈妈只要比啲心机捱几个月，就可以好似啲明星咁，生完都唔觉有生过，回复产前嘅苗条身材！