open icon

產後修身有法 產後食譜配合生活好習慣 | HealthPlus健怡坊

荷里活女演員麗素·慧絲(Rachel Weisz)為咗照顧初生女兒而息影三年,喺最近上映嘅漫威電影《黑寡婦》終於重回大銀幕。唔講你可能唔知,其實麗素·慧絲已經係一仔一囡嘅媽媽,仲已經51歲,但佢保養得非常好,著緊身衫都完全睇唔出有生過之餘,甚至同比佢後生一截嘅施嘉莉·祖安遜(Scarlett Johansson)同場,睇落都似兩姊妹多啲。大家成日見到唔少明星生完仔可以好似冇生過咁,可能會想知道有咩秘訣。其實要產後修身唔難,重點係方法有冇效。今日小編就為大家整合咗一啲產後修身方法,希望可以幫到各位新手媽媽回復青春本色。

 

點解產後咁難修身?幾時修身最好?

由於新手媽媽喺生仔嘅時候會流失大量血氣,新陳代謝嘅速度會減慢,好難消耗體內脂肪。而且懷孕嘅時候盆骨會被撐大,腹直肌亦會分離,腹部嘅內臟會移位,亦會出現因為子宮變大而造成血液迴圈,引致水腫。即使喺分娩之後,媽媽嘅肚部都唔會回復原狀,所以肚部往往係新手媽媽主要肥胖嘅位置。

新手媽媽喺產後初期元氣仲未完全恢復,冇辦法承受到一啲劇烈運動,減肥亦會令虛弱嘅身體冇辦法補充足夠營養;而如果同產期相隔太耐先開始修身,脂肪已經積聚成形,好難完全消除。唔少媽媽嘅修身期都拿捏得唔準,大幅降低修身成效。所以決心修身嘅新手媽媽一定要把握產後修身嘅黃金期,亦即係產後一個月至六個月呢段時期。喺呢幾個月時間,媽媽可以喺調整產後食譜同生活習慣兩方面入手。

 

點樣可以修身?

產後食譜

1.     低醣、低澱粉飲食

低醣飲食,係指減少攝取碳水化合物嘅飲食模式。一般產後食譜嘅碳水化合物比例都超過一半,而低醣餐單就會將碳水化合物限制喺20%左右,避免血糖波動同胰島素分泌過多,積聚脂肪。建議嘅低醣餐單食物包括奶製品、去皮肉類、豆類、蔬菜、海鮮等等。由於低醣餐單會減慢血醣轉化成葡萄糖嘅速度,減少體內葡萄糖同肝醣嘅含量,亦促進身體燃燒醣分嚟提供能量,加快產後修身。媽媽可以喺上述嘅食物種類入面自己挑選食物嚟調整產後食譜,譬如早餐食乳酪、午餐食魚香茄子、晚餐食去皮雞扒配白烚娃娃菜,減到醣分、加快脂肪燃燒之餘,媽媽又食得開心。

 2.     高蛋白、低脂飲食

如果覺得低醣、低澱粉嘅產後食譜太難跟,咁就可以試吓高蛋白、低脂肪嘅食譜。呢個產後食譜著重均衡飲食,只係需要限制脂肪攝取,所以飯、麵條、麵包等等嘅高醣、高碳水化合物食物都可以食,媽媽亦都可以揀唔同菜式,例如壽司、海鮮Pizza、卡邦尼或者牛油果帶子意粉等等,傳統啲嘅中菜就有蕃茄炒蛋、青椒炒肉絲等等。新手媽媽經過長期戒口,喺修身期間都可以食翻啲好嘢,唔洗迫得咁緊。呢啲食物可以為身體提供能量,亦係一個主要營養來源,可以令啱啱生完BB、身體虛弱嘅媽媽補充足夠營養。而含有豐富蛋白質嘅食物唔單止可以有效燃燒熱量,仲可以維持長時間嘅飽肚感,令媽媽可以減少食量,達至產後修身嘅效果。

 3.     修身湯水

新手媽媽除咗可以喺產後食譜入手,仲可以整一啲甜品同補品嚟減輕水腫問題,例如飲紅豆水同綠豆水,因為紅、綠豆有利尿作用,可以排走身體多餘嘅水份。新手媽媽仲可以煲一啲補身湯水,例如生化湯,令惡露可以更順暢排出,減少水腫,幫助媽媽喺產後儘快修身。

 4.     傳統藥療

新手媽媽仲可以進食一啲傳統中藥療嚟修身,譬如廿八方廿八方嘅第一方有當歸頭、川芎、桃仁、白背木耳等藥材,有活血袪瘀、行氣調經功效,亦促進血紅素嘅製造,幫助排清惡露,舒緩水腫情況。而第四方有玉竹、川斷、白芍、杜仲等等嘅藥材,促進血液循環,加速新陳代謝,可以消耗體內嘅脂肪,有助產後修身同復原,成效拍得住上述嘅產後食譜。

 

產後生活習慣

1.     餵哺母乳

宜家有好多新手媽媽會選擇用奶粉取代母乳,但其實用母乳餵哺有好多好處,除咗可以將營養更全面傳畀BB,提升BB嘅免疫力之外,其實對修身都好有幫助。每次餵哺母乳其實都可以消耗400至500卡路里嘅熱量,相等於慢跑一個鐘,所以持續餵哺母乳可以燃燒大量脂肪,加快瘦身。

 2.     多做運動

喺坐月期間,新手媽媽嘅身體尚未恢復,唔適宜進行劇烈嘅帶氧運動,所以係坐月階段可以進行一啲簡單嘅運動嚟燃燒脂肪,例如深蹲、棒式等訓練腿臀肌肉嘅動作。而喺坐月期過咗之後,新手媽媽可以做一啲全身嘅帶氧運動,例如腹式呼吸、拉伸運動、平躺舉肢運動。新手媽媽亦都可以出去外面緩步跑或者行山,一方面可以大量排汗,減少積存體內嘅水份,一方面可以透過運動嚟燃燒脂肪,而且屈咗喺屋企坐月咁耐又可以出去行吓,一舉三得。

 3.     充足睡眠

夜晚11點至凌晨1點係膽經運行嘅時間,所以新手媽媽每晚應該11點左右就瞓覺,捕捉人體自我修護嘅黃金時期,令身體可以更有效咁進行新陳代謝,燃燒體內嘅脂肪,加速修身。

各位新手媽媽只要比啲心機捱幾個月,就可以好似啲明星咁,生完都唔覺有生過,回復產前嘅苗條身材!

Close