今時今日好多媽媽會選擇開刀生仔，但係網絡上嘅大部份資料都係根據順產媽媽嘅身體狀況而寫。開刀生同順產好唔同，對新手媽媽身體嘅傷害好大，需要更多時間嚟回復，而且比順產有更多禁忌同注意事項，如果用錯咗食、藥療嘅方案比順產媽媽就可能有反效果。所以小編就整合咗畀開刀媽媽嘅食療、藥療推薦方案同埋注意事項，等各位開刀生嘅新手媽媽可以安心坐月。


注意事項：


1.     戒口

新手媽媽喺開刀坐月嘅時候一定要注意飲食，儘量食得清淡啲，特別係開刀媽媽，避免食一啲生冷、酸辣或者油膩嘢，以免影響傷口埋口，亦都唔可以食含有深色色素嘅食物，避免疤痕顏色加深。


 2.     小心選擇食物

開刀媽媽應該避免食一啲高蛋白質嘅食物，因為蛋白質會加速肌肉生長，令傷口埋口太快，可能會出現痕癢、繃緊甚至生肉芽嘅情況，所以海鮮類，例如生魚、蝦、蟹，同埋香菇、竹筍、大豆等等含有大量蛋白質嘅植物，都應該儘量少食。而豬肝、乳鴿、豆豉、韭菜等有收乳作用嘅食物，新手媽媽喺餵哺母乳期間都唔應該食。


 3.     切忌過份進補

新手媽媽好多時會以為進補愈多就愈好，但其實進補過量會傷脾胃同引致肥胖，甚至會影響食慾同埋消化吸收，所以喺開刀坐月前期只係需要食少少補身食品同湯水就可以㗎喇。而開刀媽媽就更加唔好心急，應該先調理好身子，然後喺產後一至兩個禮拜開始進補。


 4.     留意身體狀況

每個人體質都唔同，而且順產同開刀坐月補身方法好唔同，喺網上睇嘅食譜同資料未必適合開刀媽媽。開刀媽媽應該留意自己喺服用唔同補身食品之後有冇唔舒服，再判斷係咪應該繼續進食。如果食完之後出現發燒、傷口發炎，或者喺四至六個禮拜之後惡露排出嘅流量增加，咁就應該立即停止服用。而如果進食之後出現失眠、生痱滋、喉嚨痛之類嘅病徵，咁樣代表身體過份燥熱，應該飲一啲比較滋潤嘅湯水降一降火先，例如：無花果雪梨瘦肉湯、猴頭菇蘋果椰片南棗湯。


補身唔係愈多

5.     小心控制進補份量同次數：

愈好嘅，要留意翻自己嘅情況同需要。雖然上述湯水有豐富嘅蛋白質，有助傷口埋口，但如果飲得太多，就會令傷口埋得太快，造成繃緊、痕癢，甚至會埋口埋得唔靚、出現肉芽。所以如果開刀坐月嗰陣復原進度唔錯，精神狀況正常，就唔好飲用太多補身湯水，以免補過龍，影響傷口癒合。



開刀坐月餐單


1.     平補期

產後頭一兩個禮拜身體較為虛弱、抵抗力比較差，容易攝親，而腸胃亦都需要時間恢復，所以應該食得清淡啲，先調理好身子、強身健體、去清體內惡露。

開刀坐月餐單──湯水推薦

花膠椰肉燉雞湯

花膠味甘平，有補腎益精，滋養筋脈嘅功用，可以治療產後風痙，例如頸背僵硬、四肢抽搐。椰子性甘平，有益氣補血嘅作用，幫助身體恢復因為手術而受損嘅元氣。雞肉有補虛填精、健脾胃、活血脈嘅功效，加速傷口復元。

鱸魚、石崇魚湯

鱸魚性平味甘，有改善水腫同安胎嘅作用，而石崇魚含有豐富嘅蛋白質同Omega-3脂肪酸，有生津潤肺、健脾補腎等功效，唔單止可以加快傷口埋口，仲可以有效咁改善脾胃運作，儘早回復精力。


開刀坐月餐單──藥療推薦


廿八方（第一、二方）


開刀媽媽喺產後第8至12日可以開始飲用廿八方第一方。第一方含有當歸頭、白背木耳、川芎、桃仁、炙甘草、炮薑等藥材，可以清除體內嘅惡露、瘀血，同時當歸頭、炮薑等藥材有養血溫經嘅作用，可以調理身子。第二方含有當歸頭、川芎、紫蘇葉等藥材，川芎有驅寒作用，可以避免新手媽媽喺產後抵抗力下降嘅時候容易攝親、易有風寒感冒，紫蘇葉有行氣作用，加速身體機能恢復。


 


2.     溫補期

過咗一兩個禮拜之後就可以轉用溫補食療，主要針對身體機能恢復，同時要進補嚟促進乳汁分泌，同埋防治一啲因為懷胎而造成嘅後遺症，譬如腰痠背痛、抵抗力下降、消化能力減弱等等。

開刀坐月餐單──湯水推薦

南棗桂圓蓮藕湯

蓮藕有益胃健脾、養血補益嘅功效，可以治療煩躁口渴、食欲不振。桂圓味甘性溫，有開胃益脾、養血安神嘅用途。南棗可以補氣、滋養陰血，比起作用差唔多嘅紅棗亦冇咁燥熱，好適合新手媽媽喺溫補期食。

花生陳皮排骨湯

花生同陳皮都有補乳、催奶作用，後者亦利氣活瘀，可以通乳。而豬肉含有豐富嘅鈣質同蛋白質，可以補血、補乳，亦可以改善媽媽嘅骨骼健康，防止產後嘅腰痠背痛，針對新手媽媽嘅需要。


開刀坐月餐單──藥療推薦

廿八方（第三方）

第三方含有當歸頭、熟地黃、光南杏、肉蓯蓉、川芎、雪蛤膏等藥材，雪蛤膏有暢通腸道、滋陰補腎嘅功效，可以令開刀媽媽減少因為消化機能減弱而出現便秘嘅情況。同時，熟地黃有益精填髓嘅用途，治療產後腰痠背痛就最啱，而肉蓯蓉同南杏可以增強免疫功能，保護媽媽健康，等身體機能可以儘快恢復。


3.     大補期

喺產後大概三個禮拜身體機能已經大致復原，惡露亦都大致排清，呢個時候先可以開始進補，食一啲比較燥熱嘅補身食品，恢復體力、養氣補血等等。

開刀坐月餐單──湯水推薦

黨參燉豬展湯

黨參可以補中益氣、養血生津，專治氣血雙虧、津傷口渴。而豬展，即係豬腳嘅肌肉，性涼味甘，有補血活血嘅功用。兩者加埋可以補氣健脾、行血活氣，補翻因為開刀而受損嘅身體。


菠菜豬膶湯

菠菜性涼味甘，可以利五臟、活血脈、調中氣，而豬膶，即係豬肝，性溫味甘苦，有補肝、養血嘅功效，亦含有豐富鐵質，促進血紅素嘅製造，幫新手媽媽大補氣血，強化身體各個器官，恢復能量，增添活力。


開刀坐月餐單──藥療推薦


廿八方（第四方）

第四方用咗當歸頭、玉竹、川斷、白芍、川芎、杜仲、杞子等藥材，川芎、玉竹、白芍有滋補強壯、養血補氣嘅功效，可以大補元氣、活血通絡，而川斷、杜仲有調血脈、補肝腎嘅作用，強化新手媽媽身體各個機能嘅運作，儘快回復產前狀態。

 

4.     滋補期

喺大補期補完身之後，開刀媽媽嘅身體已經大致回復正常，跟住落嚟就應該以調理身體、養顏防老為主要目標。

開刀坐月餐單──湯水推薦

魚翅花膠燉雞湯

魚翅同花膠都係傳統嘅上等補品，魚翅可以補五臟，有益氣、補虛、開胃嘅功效。花膠有豐富嘅蛋白質同磷質，可以養顏活血，亦都含有大量骨膠原，具備補血、止血、活血同埋保持皮膚彈性等等嘅功效。配上性溫味甘嘅雞肉，可以溫中補脾、益氣養血。

木瓜花生魚尾湯

花生味甘性平，具有健脾、和胃、養血止血、下乳等功效，有助身體回復。木瓜味酸性溫，不寒不燥，有舒筋活絡、除濕和胃的功效，可以順氣、活血，好好調理身體。

開刀坐月餐單──藥療推薦


廿八方（第五方）

第五方除咗用巴戟、北芪、川斷、白芍、淮山、春砂仁等藥材，有補中益氣、強腰固腎嘅功用之外，仲加入鹿尾羓同高麗蔘兩種名貴藥材，鹿尾羓性溫味甘咸，可以養血滋陰、益精補虛，亦會消除疲勞、治腰背痛，而高麗蔘性微溫味甘，具補氣救脫、活血復脈嘅效用，兩者滋補能力極高，可以加強補氣血嘅效果，適合新手媽媽喺補充元氣之後增補氣血同養顏補身，氣血十足，自然面色紅潤，明艶照人。