【P牌媽媽，一文拆解坐月知識】：坐月嘅重要性；坐月果陣點樣進補；坐月禁忌！


唔知大家有冇聽過一個都市傳說：如果坐月期間調理同保養得唔好，足以影響女人(同老公)一生！相反，坐月坐得好，一世無煩惱。

坐月坐得唔好，通常都會出現以下嘅後遺症：


面色差，成日病

偏頭痛（頭風）

產後腰疼、關節痛、肌肉酸痛等

甩頭髮

產後抑鬱

 

所以，坐月對身心嘅健康真係好重要。喺華人社會，婦女一般都會喺產後第一個月進行「坐月」傳統習俗，以不同方式令身體得到充分休息，調理自體機能。


坐月重要性


1. 為什麼要坐月？

老一輩嘅人會形容生BB好似「喺鬼門關走一圈」，孕婦懷胎十月，無論係順產定開刀，生BB過程耗傷氣血、產後又要餵哺母乳、照顧BB等等，一連串變化都令身心有急遽轉變。簡單啲講，身體好似打完一埸仗，所以梗係需要好好休息。


2. 坐月要坐幾耐?

通常為一個月，如果條件許可為三個月。中醫學上，產後一個月稱之為「小滿月」而產後三個月稱之為「大滿月」，若能喺產後三個月內飲用補益性湯水，對日後體質有很大的幫助。


3. 產後坐月餐單?

重點少油少鹽少糖，食少多餐。

可以參考一下我地另一篇文:坐月餐單。

 

坐月禁忌


坐月禁忌1:沖涼洗頭、碰生水冷水

古時生活環境無自來水同熱水，婦女好多時用井水或者溪水沖涼，其寒涼之性會入侵身體，因此「唔可以沖涼洗頭」嘅習俗流傳落嚟。不過，而家生活環境完全唔同，只要用熱水（配合薑皮水等）沖涼或洗手，之後盡快抹乾﹑避風﹑吹乾頭髮就可以啦。


坐月禁忌2:踎低

踎低呢個動作，因盆底肌需要用力，容易令子宮下垂，再者產後媽媽氣血虛弱，正所謂「踎低起身見頭暈」。如果真係必需要踎低，就叫屋企人幫手扶住。


坐月禁忌3:拎重野

唔可以拎重野同踎低一樣道理，兩者都需要盆底肌及腹直肌用力，容易令子宮下垂，而且過大動作會拉扯到傷口，影響傷口恢復。如果要搬野嘅話，就叫屋企人幫手，媽媽最緊要多啲休息，避免不必要嘅勞動。


坐月禁忌4:吹風

因為媽媽生產後皮毛疏鬆，而且身體較為虛弱、免疫能力亦都下降，最易感風邪導致傷風、感冒，即喺俗語講嘅「入風」，仲會引起關節酸痛等。所以，一般建議夏天果陣就算開冷氣，但一定唔可以直接吹向媽媽，溫度都唔可以過低，媽媽亦要注意保暖措施，衣著唔好過份單薄，寧願勤奮替換衫褲。


坐月禁忌5:過高鹽分嘅食物、生冷食物

過高鹽分嘅食物對普通人都唔好，更何況喺產後代謝功能較差嘅媽媽。鹽分過高容易造成身體浮腫，引起水腫。媽媽產後氣虛血弱，如果再食用太鹹嘅食物，好難改善水腫嘅問題。所以，建議坐月期間飲炒米茶去幫助減輕水腫情況。除左過高鹽分食物之外，都唔建議食食生冷食物，因為產後媽媽身體脾臟虛弱，生冷食物唔單止唔利於脾胃消化吸收，亦都唔利於惡露的排出。


相信大家睇完，都對呢個坐月有一定嘅了解，希望可以幫到各位P牌媽媽！

生小朋友咁辛苦，都希望各位P牌爸爸一齊睇下了解下，一齊去迎接呢個新生命，千祈唔好做豬隊友啊！一世人得個幾次坐月嘅機會，希望各位爸爸喺坐月期間努力滿足媽媽需要，俾佢地放返一兩個月大假，因為之後就一年365日無休嫁啦！